చిలకరింత పులకరింత

తెలుగునేలని తొలకరిజల్లులు తడిపిన శుభసందర్భంలో ఈ మధ్యన పలువురు బ్లాగ్మిత్రులు అక్షరాల జల్లులు కురిపించారు తమతమ బ్లాగుల్లో.

మా దేశంలో, మేం నివాసముండే చోట తొలకరి అంటూ లేదు. ముందు గ్రీష్మతాపం అటుతరవాత వర్షపాతం తాపహరణం మా వూళ్ళొ జాన్తా నై. సంవత్సరం పొడుగునా దానిష్టం వచ్చినప్పుడు కురిసిపోతూ ఉంటుంది.

ఇవ్వాళ్ళ సాయంత్రం ఓ నాలుగుమైళ్ళు నడిచొద్దామని బయల్దేరాను. ఇల్లు ఇంకా ఒక మైలు దూరంలో ఉండగా ముందు గాలి దుమారం మొదలైంది. దాని వెంట మెల్లగా చినుకులు మొదలైనై. చిరుజల్లు కాస్తా జడివానగా ఎదగడానికి ఎక్కువసేపు పట్టలేదు. ఇల్లు చేరేసమయానికి ఆపాదమస్తకం తడిశాను. తడుస్తూ నడుస్తూ ఉంటే శంకరమంచివారి అమరావతికథల్లో వానకథ గుర్తొచ్చింది. కానీ నా చుట్టూ పంటపొలాలూ లేవు, ఎదురుగా ఆమడదూరంలో కృష్ణానదీ లేదు, వాన చినుకులు కృష్ణలో పడుతుంటే నదివొంటిమీద రేగుతున్న పులకలూ లేవు.

కానీ లోపల్లోపల ఎక్కడో ఉంది కృష్ణ.

ఈ మాత్రం వానలో తడిసి చాలా ఏళ్ళయింది.

మనసులో కృష్ణ పులకరించింది.