శ్రీపాద వారి అమోఘమైన రచన మార్గదర్శి కథ. రాజమండ్రిలో పేరుమోసిన బట్టల వర్తకుడు శంభుశాస్త్రిగారు. ఉద్యోగానికి సిఫార్సు చెయ్యమని వచ్చిన యువకుణ్ణి కూచోబెట్టి, తన సుదీర్ఘ జీవితానుభవాన్ని కాచి వడబోసి, జీవితాన్ని ఆనందమయం చేసుకోవాలంటే ఎటువంటి దీక్ష కావాలో, ఎట్లాంటి స్వస్వరూప జ్ఞానం కావాలో, ఇంకా ఎటువంటి ఆత్మ చైతన్యం కావాలో ఉపదేశించాడు. ఆ గీతోపదేశం చేసిన కృష్ణభగవానుడు స్వయానా సుబ్రహ్మణ్య శాస్త్రిగారే. అయిష్టంగానైనా అర్జునులమై ఆయన ప్రబోధం విని మనసుకి పట్టించుకోవలసింది మనమే! కథలో ఆయన బ్రాహ్మణ జాతి యువకులనుద్దేశించి ప్రసంగించినా, ఆ బోధన ఈనాడు మన ఆంధ్రజాతి కంతటికీ వర్తిస్తుందని నేను నమ్ముతున్నాను. దురదృష్టం ఏవిటంటే శాస్త్రిగారు ఈ కథ రాసి దాదాపు యెనభయ్యేళ్లవుతోంది. అప్పటినించి ఇప్పటికి ఈ కథలో స్పృశించిన విషయాల్లో తెలుగుజాతి ఎదగడం పోయి మరింత దిగజారిన స్థితిలో ఉంది.
ఆ మహానుభావుని కలంనించి జాలువారిన ఈ మహాశక్తివంతమైన మాటల్ని నాగొంతులో పలికించడానికి సాహసించాను.
సహృదయులు మెచ్చుతారని ఆశిస్తున్నాను.
| Powered by eSnips.com |
చివరి మాట: మరి కొన్ని గొప్ప తెలుగు కథల్ని ఇలా ఆడియోగా అందించాలని సంకల్పం. ఇది తొలి అడుగు మాత్రమే. ఏవన్నా ఆచరణీయమైన మార్పులూ చేర్పులూ సూచనలూ ఉంటే, దయచేసి చెప్పండి.
46 comments:
ఒక ఫైలు లో పెట్టడానికి వీలవదాండీ?
మొత్తం నిడివి రెండు గంటల పైన పట్టింది. ఒక ఫైలు చేస్తే మేనేజ్ చెయ్యలేం.
ఈస్నిప్సులో ప్లేలిస్టు పెట్టే విధానం ఒకటి ఉంది గానీ అది నాకు చేతకాలేదు. అది కుదిరితే, అన్ని ఫైళ్ళూ ఒకదాణి వెంబడీ ఒకటి ప్లే అయ్యేట్టు చెయ్యొచ్చు.
కొత్తపాళీగారు,
ఇప్పుడే ర.బలో వేగుచూసి వచ్చాను. వినడం పూర్తవలేదు విన్నంత వరకూ చాలా గొప్పగా వుంది. మీ గొంతూ, ఉచ్చారణా కథకి బాగా నప్పాయండి.
కొత్త ప్రయోగం.. మంచి కథ ఎంచుకున్నారు.. ఇందులో నాకు వైశ్య కుటుంబం పేలాలు అమ్మే సన్నివేశం అంటే ప్రత్యేకమైన ఇష్టం.. ఆ పాత మధురాలని మీ గొంతు నుంచి వినొచ్చన్న మాట... కాపీరైట్ ఇబ్బందులు ఏవీ ఉండవా?
అద్భుతం అండి. మంచి విషయం. రిచ్ డాడ్ పూర్ డాడ్ కి తెలుగు అంటారా..
మీ గొంతు చాలా చక్కగా సరి పోయింది.
రచయితకు, గొంతు తో నటించిన మీకు ధన్యవాదాలు.
Hi
This is really good idea!
but somehow i am not able to play any of these files :(
somehow esnips play option is not enabled
i am able to listen Sravan's daily Keertana's without fail.
my two cents about audio books
this idea was there before, tried few groups for quite sometime, somehow this did not click, may be people did not like reader's modulation or may be with problems from internet.
but if someone can read like old radio's navala vahini' :) then i think it will be a big sucess!
పైకి చదవడం లో అకడక్కడ చిన్న చిన్న తడబాట్లు కనిపించినా, మొత్తం మీద స్వచ్చమైన ఉఛ్చారణ తో చాలా బాగా వినిపించారు కొత్తపాళీ గారు. మంచి ప్రయత్నం. కొన్ని పదాలని మీరు పలికిన తీరు చాలా ఆకట్టుకుంది.
మనలో మన మాట "సహృదయులు మెచ్చుతారని ఆశిస్తున్నాను" అంటే మెచ్చని వారు సహృదయులు కారనా :-) (Just kidding)
అన్నట్లు ఇందాక చెప్పడం మరిచాను కధ బాగుంది. మరిన్ని మంచి కధలు అందిస్తారని ఆశిస్తున్నాను.
నా గొంతు అస్సలు బావుండదు. వినటానికి ఎలా వుంటుందో కూడా నాకు తెలియదు. కానీ మీ ప్రయోగం గురించి తెలుసుకున్నాక( ఇంకా మీ కంఠంతో మార్గదర్శిని నేను వినలేదండోయ్, సాయంత్రం ఇంటికెళ్ళాక వింటాను) వెంఠనే ఓ కోరిక మనస్సులో ఘట్టిగా (టైపాట్లు కాదు) ఏర్పడిపోయింది.అదేంటంటే నాకు చాలా చాలా ఇష్టమైన మల్లాది రామకృష్ణ శాస్త్రిగారి కృష్ణాతీరం నవలని ఎప్పటికైనా మీలాగే నేను నా సొంత గొంతుతో చదివి రికార్డుచేసి నా బ్లాగులో పెట్టుకోవాలని. ఎందుకంటే నా కా పుస్తకమంటే అంతిష్టం గనక.
దయతో నాకు ఈ రికార్డింగు అదీ ఎలా చెయ్యొచ్చో ఎలా బ్లాగులో పోస్టు చెయ్యాలో కొంచెం చెప్పగలరా?
మీ ప్రయోగం చాలా బాగుంది.
మీ గొంతు, ఉఛ్ఛారణ అప్పటి శైలి కి సమకాలీనంగా ఉంది.
సుమారు పది సం:రా ల క్రితం నాటిమాట. కీ.శే.జె.వి.సోమయాజులు,రమణమూర్తి గార్ల బృందం 'కన్యాశుల్కం'ప్రదర్శించారు. ప్రదర్శన సాంతం చూసి చాలా కలత చెంది, ప్రదర్శనానంతరం సోమయాజుల వారిని కలసి ఎందుకు అన్ని మార్పులు చేయాల్సి వచ్చిందని అడిగాను. వారిచ్చిన సమాధానం...జనాదరణ కోసం మార్చాల్సి వచ్చిందని శెలవిచ్చారు. భాష శైలి మార్చారు. సరే. సన్నివేశాలెందుకు మార్చారని అడిగితే మళ్ళీ అదే సమాధానం.మరింక వాదించ దలచుకోలేదు.
ఇలా ఎవరికి తగినట్లు వారు మార్పులు చేసుకుంటూ పోతే ఇక ఆనాటి ఆచార వ్యవహారాలు, సంస్కృతీ,సంప్రదాయాలు ముందు తరాలకి తెలిసేదెలా.
ఏదో అన్యాయం జరిగిపోతోందన్న వేదన, ఒక సాహిత్యాభిమానిగా ఏమీ చేయలేక పోతున్నాననే వెలితి నన్ను కలచి వేస్తుండేది.
ఇదిగో ఇన్నాళ్ళకి మీద్వార ఆ లోటు తీరుతున్నందుకు చాలా సంతోషంగా ఉంది.మీ తొలి ప్రయత్నం లోనే అఖండ విజయాన్ని సాధించారు.
ఒక మంచిపనికి అందరి అండదండలు ఉంటాయి.
The people who teach Personality development and Marketing strategies are unfit to their profession if they do not read this story.
మీరు అనుమతిస్తారో లేదో తెలియదుకాని మా పాఠశాల పిల్లలకి ఇది వినిపించాలని ఉంది. కనీసం తెలుగు ఉచ్చారణ ఇదీ అని తెలుస్తుంది.
మీ స్వరం నుండి మరిన్ని కధలు జాలు వారాలని
ఆశిస్తూ మీ అభిమాని.
రమణ .. కాస్త తీరుబడి ఉన్నప్పుడు పూర్తిగా విని ఏమైనా సలహా చెప్పండి, తదుపరి మెరుగుల కోసం.
మురళి .. ధన్యుణ్ణి. పేలాల కథ నాలుగో భాగంలో ఉంది. ఇంత పొడుగు కథ తరవాత, తదుపరి చేసేది చిన్నగా ఎంచుకుందామనిపించి, అమరావతి కథల్లో ఒకటి చదువుదామనుకుంటున్నా. మీ రికమెండేషను?
మైత్రేయి .. రిచ్ డాడ్ పూర్ డాడ్ చదవాల్సిన పుస్తకమే. కానీ ఈ కథలో శ్రీపాద వారు ఇంకా చాలా విలువైన జీవిత సత్యాలు చెప్పారు.
ఆనొన్ .. ఫ్లేసె ప్రొవిదె అ నమె నెక్ష్త్ తిమె. ఏస్నిప్స్ ప్లయ్ ఒప్తిఒన్ షౌల్ద్ బె వొర్కింగ్ నౌ.
వేణు .. రసజ్ఞులు అని ఉండాలి. నిజంగా ఇక్కడ సహృదయత ప్రస్తావన ఏమీ లేదు. అవును, నాలుగైదు చోట్ల తడబడ్డాను.
నరసింహ గారు, ఒక చిన్న mp3 ప్లేయరు కొనుక్కోండి, రికార్డింగు చేసే వెసులుబాటు ఉన్నదిగా చూసి. మీ పని సులువవుతుంది. మీక్కావాలంటే, నేను ఈ కథని రికార్డు చేసి ఇక్కడ పెట్టిన పద్ధతి అంతా ఒక బ్లాగు పోస్టు రాస్తాను.
శ్రీనిక .. మీ విద్యార్ధులకి తప్పక వినిపించండి. కాకపోతే, ఇది ఇంచుమించు 2.5 గంటల పొడుగు. ఇటుపైన ఇంకొంచెం చిన్న క్థలు వెలువరిస్తాను. కన్యాశుల్కం ప్రదర్శనల గురించి రమణమూర్తిగారు డిట్రాయిట్ తెలుగు సాహితీ సమాఖ్యలో ప్రసంగించినప్పుడు చెప్పారు. ఇందులో సోమయాజులు గారు వేషం వెయ్యడం తప్ప ఆయన ప్రమేయం ఏం లేదుట. నిర్వహణ, మార్పులు చేర్పులు అంతా రమణమూర్తి గారిదే. ఆయన దృష్టిలో గిరీశం హీరో. అలా హీరో అయిన వాడు చివరికి దగుల్బాజీగా మిగిలిపోవడం నచ్చక, గిరీశం మారినట్టూ, బుచ్చమ్మని పెళ్ళాడినట్టూ మార్చుకుని ప్రదర్శించేవారు అని చెప్పారు. అవును, ఆయన కన్యాశుల్కం డయలాగులు చెబుతుంటే, విజయనగరం యాస కనబడదు. నా వాచికంలో కూడా శ్రీపాదవారి కోనసీమ యాస రాలేదు, నా విజయవాడ యాసే ఉంది. ఎవరైనా కోనసీమవాళ్ళు శాస్త్రిగారి కథల్ని రికార్డు చేస్తే బావుంటుంది.
మంచి ప్రయత్నం.
అమరావతి కథల్లో 'పూల సుల్తాన్'చాలా టచింగ్గా ఉంటుంది, అదీనూ, భోజన చక్రవర్తి' మీ గొంతులో వినాలి.
కొత్త పాళీ గారికి
అనుమతించినందుకు ధన్యవాదాలు.
ఇక మీ శైలి చిషయానికి వస్తే...
నేను తూ.గో.జిల్లా వాసినే.ఉభయ గోదావరి జిల్లాల భాష, క్రిష్ణా జిల్లా భాష శైలి విషయానికొస్తే.. పెద్ద వ్యత్యాసం ఉండదు. ముఖ్యంగా బ్రాహ్మణ జాతిలో..వేరే వర్ణాల్లో ఇది ప్రస్ఫుటంగా కనిపిస్తుంది. కాని కొంచెం గుంటూరు జిల్లాకి వెళ్ళేసరికి యాసలో వ్యత్యాసం స్పష్టంగా కనిపిస్తుంది మీ కామెంటు చదివాకా మళ్ళీ విన్నాను. మీ ప్రాంత ప్రభావమేమీ లేదు.
మంచి ప్రయత్మం .ఇలాగే కొనసాగించండి. మీకు వీలున్నప్పుడు అంటే కనీసం నెలకొక్కటన్నా ఈ ఆడియోవిందు ఇవ్వాలని కోరుకుంటున్నాను.
కవిలెలు అంటే files or format.
కవిలెలు అని అచ్చతెలుగులో చెప్పి, ఆడియో అనడంలోగల పరమార్ధం తెలుసుకోవచ్చా.నాకైతే సాంబారులో నూడుల్స్ వేసుకున్నట్టుగా అనిపించింది. ఏమనుకోకండి..:)
జ్యోతిగారూ, పరమార్ధం ఏం లేదండీ. కంప్యూటరు పరిభాష కూడా సాధ్యమైనంత వరకూ తెలుగు వాడాలని ప్రయత్నం. ఖర్మకాలి ఆ క్షణానికి ఆడియోకి తెలుగు తట్టలేదు .. ఇప్పుడూ తట్టటం లేదు :(
ఐనా అప్పుడప్పుడూ వెరైటీ కోసం సాంబార్లో నూడుల్స్ వేసుకున్నా తప్పేం లేదులేండి :)
ఆడియో కి శ్రవ్యకం అని నేను చాలా చోట్ల వాడాను.
--తాడేపల్లి
నెనర్లు తాడేపల్లి గారూ.
శ్రీపాదవారు చెప్పినదాన్నే నేను "నిరుద్యోగం పురుషలక్షణం"లో ఇంకో విధంగా రాశాను.
Mugdha manoharamga , adhbutha jagruthi satkhi kaligi unnayi katha , daanini cheppina teeru rendunnu. Vinipinchinandu hrudaya poorvaka vandanaalu.
looks like the files got corrupted. Now I am not able to listen to the story. can u help ?
మైత్రేయి.. నాకు పని చేస్తున్నాయండీ. ఒక వేళ మీ ఇంటర్నెట్ కనెక్షను ఏమైనా స్లో అయిందేమో ఆ సమయానికి. స్లో కనెక్షనుతో స్ట్రీమింగ్ ఆడియో విడియో సరిగ్గా పని చెయ్యదు.
తాడేపల్లి గారూ, గుర్తుంది. మీ వ్యాసం చదివినంత సేపూ నాకీ కథే మనసులో మెదుల్తూ వచ్చింది.
తెరెసా గారి మాటే నాదీనూ..
sir, I am running this from office connection. So there is no issue with connection or speed. I could listen to 6 parts on friday. I tried from home connection after reaching home that night. (by then you changed the file links) I had issues. Then I tried again on tuesday from office, still same problem. I heard same comment from some of my friends with whom i shared this.
Baagundi.
మైత్రేయి గారు, ఈస్నిప్స్ మీకెందుకు ప్లే కావట్లేదో మరి నాకు అర్ధం కావట్లేదు. కింద ఈస్నిప్స్ ఫోల్డర్ ఎడ్రసు ఇస్తున్నా. దానిలో విడివిడి ఫైళ్ళు ప్లే అవుతాయేమో చూడండి.
http://www.esnips.com/SharedFolderAction.ns;jsessionid=6829DCB793C75E23DFE88FA6D36D0293
బలే బలే వుంది బలే వుంది చాలా బాగా చెప్పేరు... ఆ యాస వెటకారం, ఆ చిరాకు వెటకారం, "అహం" కారం, "మమ" కారం హి హి హి బాగా చదివారు, విజాతీయ విజ్ఞానం అన్నప్పుడు ఇంకా కొంచం చిరాకు పెట్టవలసింది... అదేంటి కొత్తపాళి గారు మీరు కూడా శా ను షా అన్నారు మొదటి మాట లో.. :-( కొన్ని చోట్ల కన్యాశుల్కం లో రామప్ప పంతులు గారు గుర్తు వచ్చారు... ఈ కామెంటంతా మొదటి పార్ట్ మీదే ... ఇంకా రెండు విన్నాక రెండో కామెంట్
@భావన .. శ కి బదులు ష .. ఎక్కడా? మార్గదర్శి అన్న టైటిలు పలకడంలోనా? శ అనే పలికానండీ.
"సన్నిపాతించటమంటే?" నేనైతే కేరింతలు కొడుతున్నా మీ కధ వింటు, నేను ఇలానే మనసులో చదువుకుంటా నేను పుస్తకం చదివేప్పుడు, నా బుర్ర లో ఆ గొంతు అలా కదులుతు వుంటుంది చదువుతుంటే... "మా అమ్మ" అంటు ఎంత బాగా చెప్పేరో... కూసంత ప్రేమ, బోలెడంత అభిమానం అంతకంటే ఆ స్వాభిమానం కళ్ళనుంచి నీళ్ళు వచ్చాయి, బలే వుంది ఆడియో బుక్... ఎంచక్క గా పని చేసుకుంటూనే కధ వింటున్నా, "లోకం లో మనుష్యులకంటే సంసారం గడుపుకునే విధానాలే ఎక్కువున్నాయి, ఎవడికైనా దారి దొరకలేదూ అంటే" బలే అన్నారు మీరు. బలే భావం వినపడింది... బావుంది కధ కూడా... నిజమే కదా 80 ఏళ్ళ కితం మాటలు ఇప్పటికి అదే నిజం కదా.. పాత రచయతలెవరైనా ఒకటే చెప్పినట్లు వుంటుంది కదా.. "చిల్లర శ్రీ మహా లక్ష్మి" హి హి హి మీరు ఒక పోస్ట్ కూడా రాసినట్లు వున్నారు కదా. "ఎక్కడ ఆడినా ఏదో ఒకటి తీసుకొస్తూ వుండే వాడు" అనే పేరా వింటున్నప్పుడు "piece of string" కధ చదివేను చిన్నప్పుడు అది గుర్తు వచ్చింది. "దురన్న దుగ్ధాన్నాలా" అంటే ఏమిటి? రెండో కథ ఆఖరి లో చాలా ఆఖరి లో కోమటి అబ్బయి గురించి చెప్పేప్పుడు...
ఈ కథ వింటున్నప్పుడు తాడేపల్లిగారి 'నిరుద్యోగం పురుషలక్షణం' గుర్తొచ్చింది. ఇండిపెండెంట్ డిజైనర్గా నాణ్యమైన జీవితాన్ని ఆస్వాదిస్తున్నానన్న నా మిత్రునికి ఈరోజే మీరు చెబుతున్న ఈ కథను వినమని పరిచయం చేశాను.
మూడు -- ఎంత జీవిత సత్యం కదు."లాభం తెచ్చిన వుల్లాసం అతనిది, దెబ్బ తిన్న వుద్వేగం నాదీను" బలే వున్నాయి ఇలాంటి వాక్యాలు మీ గొంతు లో.. " మూడో మాటు మనం కూడా చేద్దామా అనిపించింది కాని చీ బ్రాహ్మణ పుటక పుట్టలేదు అని అభిజాత్యం అడ్డు వచ్చింది..." చురుక్కుమంది ఒక్కసారి మన యాటిట్యూడ్ లు గుర్తు వచ్చి, చాలా బాగా చాదివేరండి, మొదటి దాని మీద మూడో దానికి వచ్చేసారికి భావం ఇంకా తేట తెల్లం గా గొంతులో ప్రజ్వరిల్లింది. ఆఖరిలో ఆ వర్ణన వింటుంటే ఒక్క సారి మన పల్లెటూరి రాత్రి ఒక్క సారి కళ్ళముందు కనిపించింది. బేడ అంటే 12 పైసలు కదు? కాణీ అంటే? అణా అనే మాట వుపయోగిస్తాము(కధ ల లో) కాని అంటే ఎంత? పావలాలు, బేడలు ఒక్క సారే వున్నాయా వాడుకలో? మీకూ తెలియదేమోలే మా అమ్మ ను అడుగుతాను ఫోన్ చేసి...
నాలుగు -- "రూపాయి చేతి లో వుంటే ఎంతో ధిలాసా" .. హి హి హి మా అమ్మ చిన్నప్పుడూ ఎప్పుడు ఇలానే తిట్టేది.. ఇంకో సారి ఒళ్ళు మండింది... నాలుగో దానిలో మీ గొంతు వేర్వేరు వ్యక్తుల మధ్య తేడా ఆ మాడ్యులేషన్ బాగా వచ్చింది. ఇక్కడికి వచ్చేసరికి బోర్ కొడుతోంది మరీ ఈ డబ్బుల గోల ఏమిటి రా బాబు మళ్ళీ మా నాన్న నా ఎదురు గా కూర్చుని క్లాస్ ఎడుతున్నట్లు వుంది.. వా..... నాకొద్దు రా బాబు ఈ వ్యాపర మారకపు కధ లు మా నాన్న అమ్మ చిన్నప్పుడు ఈ కధ లు చెప్పి చెప్పి చెప్పీ :-| హ్మ్మ్ ఇంక ఈ రోజు కు చాలు రేపు వింటాను... :-(
ఇంకో మాట నాలుగులో నన్ను తిట్టేరు కూడా... శ్రీ పాద వారు చదివి మీరు. I hurted. ;-)
భావన .. టపాలు సీరియల్గా ఉండడం చూశాం గానీ ఇలా వ్యాఖ్యలు సీరియల్ గా ఉండడం ఎక్కడా చూళ్ళేదు. ఐనా పర్లేదు. ఎక్కడో చోట మొదలవ్వాలి గదా.
మీ ప్రశ్నలకి ..
దురన్న దుర్దానాలు .. శంభుశాస్త్రి తండ్రిది యాచక వృత్తి. దాన్లోకూడా తరతమ భేదాలున్నాయి. తిలదానం కథ చదవండి. శనిగ్రహ శాంతికై నువ్వుల దానం స్వీకరించడం అన్నిటికన్నా లోకువ. తన తండ్రి అటువంటి లోకువపనులు చెయ్యలేదు అని శంభుశాస్త్రి అంటున్నాడు.
సన్నిపాతించడం అంటే నాకూ సరిగ్గా తెలీదు. కోమాలోకి వెళ్ళడం అనుకున్నాను నేను.
అణాపైసల లెక్క .. . అర్ధణా సంగతి చిల్లర శ్రీమహాలక్ష్మి టపాలో ప్రస్తావించాను. నాలుగు కానులు ఒక అణా, నాలుగు అణాలు ఒక పావులా, నాలుగు పావులాలు ఒక రూపాయి. కానీ నించి అణా దాకా లెక్క .. కానీ, అర్ధణా, ముక్కానీ, అణా.
అణానించి పావులాకి లెక్క .. అణా, అణాకానీ, బేడ, అణాముక్కాని, పావులా.
బేడ = రెండణాలు.
పూర్వం ముక్కానికీ, అణాకీ, బేడకీ కాసులుండేవి. షావుకారు సినిమా చూస్తే, సినిమా మొదట్లోనే .. ఈ అణా కానీల లెక్క ఒకటుంటుంది. మీ అమ్మగారి దగ్గర్నీంచి కనుక్కున్న దాంట్లో నేను చెప్పింది ఏదైనా తప్పని తెలిస్తే తప్పక తెలీయ్జెయ్యండి.
@మైత్రేయి .. ఈ కింది లంకెలో చూడండి, విడి విడి శ్రవ్యకాలు (audio files) కనబడతాయి. అవి మోగుతాయేమో ప్రయత్నించి చూడండి.
http://www.esnips.com/web/verrigonthukaviccimrosanu
మీరు ఎక్కడ "శ" ను "ష" అన్నారంటే మార్గదర్శి లో శి ని, శ్రీ పాద సుబ్రమణ్య శాస్త్రి గారు లో శాస్త్రి గారి లో శా ని... అస్సలు పెద్ద విషయం కాదు లెండీ, వూరికే గమనింపుకొచ్చింది కదా అని అన్నా అంతే.. మరి రంధ్రాన్వేషణ అనిపిస్తే సారి.
మా అమ్మ కూడా అణాల లెక్క మీరు చెప్పిందే చెప్పింది... సన్నిపాతమంటే వాతం కమ్మటమంట..
ఇప్పుడే చూశానండి. ఎంత వెనకబడిపోయివున్నానో కూడా ఇప్పుడే తెలిసింది.
చాలామంచి ప్రాజెక్టు. తెలుగు చదవడం రానివాళ్లకీ, కంప్యూటరుముందు అట్టేసేపు కూర్చోలేనివారికీ గొప్ప సదుపాయం. అభినందనలు.
మీ వెబ్ చోటు ప్రేరణ తో శ్రీపాద గారి రచనలు సంపాదించి చదవటం మొదలు పెట్టేను.వారి రచనలు గొప్పవి. వారు తెలుగు భాషకు చేసిన సేవ ఎనలేనిది. వారిని పునః పరిచయం చేసినందుకు ధన్య వాదాలు. ఈ మధ్యనే pustakam.net లో విష్ణు భొట్ల లక్ష్మన్న గారు శ్రీపాదవారి ఆత్మ కధని పరిచయం చేయటం జరిగింది. ధన్యవాదాలు.
నా వద్ద ఇంటర్నెట్ కనెక్షన్ చాలా నిదానంగా ఉంది పీడ. అప్పుడెప్పుడో మీరు, "ఎవ్వాని" పద్యం జాలంలో పెట్టినప్పుడు, అది వినడానికి చుక్కలు కనబడ్డాయి. ఈ కథ, శ్రీపాద వారి, ఏ కథల పుస్తకంలో ఉందో తెలుపగలరు. (నా వద్ద పుల్లంపేట జరీచీర అన్న సంకలనం ఉంది. ఇంకా చదవడం ఆరంభించలేదు)
@ రవి .. కొత్తగా విడుదలైన సంపుటాల్లో ఒక దాని పేరు మార్గదర్శి. అంచేత ఆ సంపుటంలోనే ఈ కథ ఉందనుకుంటా.
ur voice modulation is very nice.
నేనిప్పుడే చూశానండీ ఈ పోస్ట్. చాలా ఆలస్యమైనందుకు చింతిస్తున్నాను. చాలా మంచి ప్రయత్నం. మీరు బాగా చదావిరు. కొంచెం తడబాటు ఉన్నా తరువాతి వాటికి స్పష్టత సాధిస్తారని అనుకుంటున్నాను. నిజంగా ఈ కథ అంటే నాకూ చాలా ఇష్టం. ఒక రకంగా నాలో చైతన్యం కలిగించిన వాటిలో ఈ కథ కూడా ఒకటి. మార్గదర్శిలో శ్రీపాద వారు చెప్పిన మాటలు వేదవాక్యాలండీ. ఇప్పటికైనా వాటిని మనం ఆచరింగలిగితే అంతకన్నా మేలు మరొకటి ఉండదు. మీ ప్రయత్రం వల్ల ఈ కథలు చాలా మందికి తెలిసే అవకాశం ఉంటటుందని ఆశిస్తున్నాను. ఈ విధంగా అయినా మన ఆలోచనల్లో మార్పు ప్రారంభం అయితే బాగుటుంది కదా. ఈ కథలోని ప్రతీ వాక్యం అక్ష సత్యాలు. ఆలోచిస్తే ప్రతీ వాక్యం, అక్షరం కూడా మన జీవితాలకి మార్గదర్శకాలు అవుతాయి. అసలు శ్రీపాద వారి కథలంటేనే నాకు ప్రాణం. అందుకే పట్టుబట్టి మరీ వారి కథల మీద ఎంఫిల్ చేసాను. ఇప్పడు కౌముదిలో నా ఎంఫిల్ సీరియల్ గా ప్రచురితమౌతోంది. సెప్టెంబర్ లో మొదలైంది. వీలయితే ఒకసారి చదవండి. పై వాక్యాలు వ్యాఖ్య ప్రచురించేటప్పుడు అనవసరమనుకుంటే తీసేయవచ్చు.
ఈ ప్రయోగమెప్పుడు చేసారం్డీ నేను ఇదే చూట్టం
మీరు జనాన్ని మరీ బద్ధకస్తుల్ని చేసేస్తున్నారు. చదివే పనిలేకుండా ఎంచక్కా వినిపించేసి..
నాకు చిన్నప్పుడు ఆకాశవాణి విజవాడ కేంద్రం లో విన్న కథానికలు గుర్తొచ్చాయి. గొప్ప ప్రయత్నం. మనసుకి హాయిగా ఉంది.
అద్భుతమైన కథ...శ్రీపాద వారి అన్ని కథల్లోనూ నాకిదే చాలా ఇష్టం...కానీ ఈ esnips నాకు ప్లే అవ్వదు. దీనిని వినే ఇంకో మార్గం లేదా? ఉంటే చెప్పండి ప్లీజ్.
పైన మనోజ్ఞ గారి వ్యాఖ్యతో ఈ పాతటపాకి మళ్ళీ జీవం పోసినట్లైంది :)
మనోజ్ఞ, స్వాతి, సౌమ్య - నెనర్లు.
సౌమ్య - ఏమోనండీ. నాకు ఈ ఆన్లైన్ సర్వీసులు చాలా వాటిని వాడడం చేతగాదు. మొదటి రికార్డింగులు ఎక్కడున్నాయో వెతకాలి. అవి దొరికితే ఏదన్నా ఫైల్ మార్పిడి గూట్లో పెట్టే వీలుందేమో చూసి తెలియజేస్తాను.
Post a Comment