కబుర్లు - నవంబరు 29

ఉత్తర కొరియాలో ముసలివాడైన నాయకుడినించి యువనాయకుడికి అధికారం బట్వాడా చేసే కసరత్తులో భాగంగానే దక్షిణకొరియామీద కాల్పులూ, కయ్యానికి కాలుదువ్వడాలు జరుగుతున్నాయని ఇక్కడ విశ్లేషకుల ఊహాగానాలు నడుస్తున్నాయి. గద్దెనెక్కబోయే యువనాయకుడు యుద్ధ పరిస్థితుల్ని ఎదుర్కోగలడు, యుద్ధంలోనూ దేశాన్ని నడిపించగలడు అని చూపించడానికట ఈ శ్రమంతా - యేమి లాజిక్కురా నాయనా! ఉరుమురిమి మంగలం మీద పడిన చందంగా ఉంది. రాజకీయ ప్రత్యర్ధుల నడుములమీద లాఠీలు విరిచేందుకే తెలుగు గడ్డమీద కిరణోదయం అని అంటున్నారు, మరి ఇప్పటిదాకా ఎటువంటి అధికార పదవి నిర్వహించని అనుభవశూన్యుడైతే చెప్పినపని చెప్పినట్టు బాగా చేస్తాడని అధిష్టానం అంచనాయేమో. తెలుగు వెండి తెరమీద ఇంకా నటన బతికే ఉంది అని సూచించే పంచప్రాణాల్లో ఒకరైన తనికెళ్ళ భరణిగారికి వెండిపండగ చేశారు హైదరాబాదులో అంగరంగ వైభోగంగా. భేషజం లేకుండా పెద్ద పెద్ద స్టార్లు, సాధారణంగా బయట కనబడని ప్రకాష్ రాజ్ వంటి దిగ్దంతులు కూడా హాజరయ్యి ఆయనపట్ల గౌరవం వెలిబుచ్చారంటే భరణిగారి రేంజ్ ఏవిటో అర్ధమవుతోంది. వారికి మన బ్లాగర్లు కూడా యథోచితంగా అక్షర నీరాజనాలు పట్టారు, సంతోషం.

ఇవ్వాళ్ళ కార్తీకమాసంలో ఆఖరి సోమవారం. ఐతే ఏంటి? ఏం లేదు, శివుడంటే భక్తి ఉంటే చేతనైనట్టు శివప్రీతి చేసుకుంటారని, అంతే!

వ్యాపార ప్రకటనే కావచ్చు, కానీ ఒక్కోసారి గొప్ప దృశ్యకావ్యమవుతుంది. థాయ్ భాషలో రూపొందించిన ఈ షాంపూ ప్రకటన నన్ను మంత్రముగ్ధుణ్ణి చేసేసింది.

ఆరోగ్యం


గత కబుర్ల తరువాయి
మనం చిన్నప్పుడు బహుశ ఆరోక్లాసులోనో ఏడో క్లాసులోనో చదువుకున్నాం, మనం తినే భోజన పదార్ధాలన్నీ కూడా కొన్ని మౌలికమైన పోషకపదార్ధాలుగా విడిపోతాయని - అందులో ముఖ్యమైనవి పిండి పదార్ధాలు, మాంసకృత్తులు, కొవ్వు, విటమిన్లు. ప్రాచీన నాగరికతలన్నీ పిండిపదార్ధాలకి పెద్దపీట వేశాయి తమ ఆహారపు అలవాట్లలో. అలా మనకి అన్నం పరబ్రహ్మ స్వరూపమే అయి కూర్చుంది. ఇటీవల మనవాళ్ళు (అంటే తెలుగు వాళ్ళు) కొంచెం ఆరోగ్యాన్ని, శరీరపోషణని సీరియస్ గా పట్టించుకునే వారు రాత్రి పూట అన్నం మానేసి చపాతీలో పుల్కాలో తినడం చేస్తుంటారు. మరి కొందరు మొక్కజొన్న పొత్తులో విత్తులో తినడం సాగించారు, ఉదయం బ్రేక్‌ఫాస్టుకి కార్న్‌ఫ్లేక్స్ తింటున్నారు - ఇది ఆరోగ్యానికి చాలా మంచిదని కూడా ఒక పక్కన వ్యాపార ప్రకటనలూ, ఇంకోపక్క (వైద్య) అభిప్రాయాలూ గుప్పిస్తున్నారు మీడియాలో. వెరసి జరుగుతున్నదేవిటంటే మునుపెన్నడూ లేనంతగా మనం ఇప్పుడు పిండిపదార్ధాల్ని స్వాహా చేస్తున్నాం. అదే, ఇప్పుడు మహా ముప్పు తెచ్చి పెడుతున్నది. సగానికి సగం మంది మధుమేహం (డయబీటిస్) తో బాధపడుతున్నారు. ముప్ఫైలు నలభైల్లో ఉన్నవాళ్ళకే ఇప్పుడు షుగర్ కంప్లెయింట్, లేదా టైప్ 2 డయబీటిస్.

పిండి పదార్ధం జీర్ణక్రియలో జీర్ణమయ్యాక లాస్టండ్ ఫైనలుగా చక్కెర (గ్లూకోజు)గా మారుతుంది. ఏ ముడిపదార్ధం ఎంత త్వరగా ఎంత సులభంగా చక్కెరగా మారిపోతుంది అన్నదాన్ని బట్టి, గ్లైసీమిక్ లోడ్ అని ఒక సూచికని లెక్కవేశారు సైంటిస్టులు. ఈ కింది పట్టికలో, సంఖ్య ఎంత ఎక్కువైతే ఆ పదార్ధం అంత సులభంగా చక్కెర అవుతుంది - అంటే డయబీటిస్ దృష్ట్యా అంత రిస్కన్న మాట.
తెల్ల అన్నం = 64
బంగాళ దుంప = 85
కార్న్ ఫ్లేక్స్ = 92
తెల్ల బ్రెడ్ = 70
గోధుమ బ్రెడ్ (చపాతీ) = 55
దంపుడు బియ్యం (బ్రౌన్ రైస్) = 55
చూశారుకదా, గోధుమ వస్తువులుకానీ, మొక్కజొన్న పదార్ధాలుకానీ, షుగర్ దృష్ట్యా వరన్నం కంటే పెద్దగా ఆరొగ్యకరమైనవి కావు.

పర్యావరణం


కొంచెం ఆలోచన పెడితే, కొద్దిగా శ్రద్ధగా ఉంటే, మన పుడమితల్లికి మనమే మన పరిధిలోనె ఎంతో సాయం చెయ్యొచ్చు. ఈ మధ్యకాలంలో ఇంట్లోనించే పని చెయ్యడం, లేదా హోం ఆఫీసులు పెట్టుకుని చిన్న పరిశ్రమలు, చిన్న వ్యాపారాలు నడపడం బాగా ఎక్కువైంది. ఇది వ్యకతిగత అభివృద్ధి దృష్ట్యా ఆహ్వానించాల్సిన పరిణామం కూడా. ప్రతీ హోం ఆఫీసులో ఒక నకళ్ళ యంత్రం (కాపీయరు), ఒక ప్రింటరు (లేజరో, జెట్టో) ఉండడం సర్వసాధారణం.
ఈ యంత్రాల్లో ఇంకు (కాగితమ్మీద అక్షరాల్ని రూపొందించే నల్లటి లేదా రంగు పదార్ధం) కేర్ట్రిడ్జిలనే చిన్న డబ్బాల్లో ఉంటుంది. లేజర్ ప్రింటర్లో ఉపయోగించే కేర్ట్రిడ్జి సుమారు ఐదు పౌనులు (రెండు కిలోలు) బరువుంటుంది. ఇందులో ఇంకు పూర్తిగా వినియోగమైపోయినా ఆ ప్లాస్టిక్ డబ్బాని తిరిగి ఉపయోగించుకోవచ్చు. ఇదే ఉద్దేశంతో ప్రపంచ వ్యాప్తంగా కేర్ట్రిడ్జి రిఛార్జి వ్యాపారాలు మొదలైనాయి. మీ చుట్టుపక్కల ఇటువంటి వ్యాపారం ఉందేమో గమనించుకోండి. చాలామంది మీ ఖాళీ కేర్ట్రిడ్జి తీసుకుని మరొక నిండు కేర్ట్రిడ్జి వెంటనే ఇస్తారు. ఒక్కొక సారి కొంత సమయం పట్టవచ్చు. ముందే కనుక్కుని ఉంటే మంచిది.
యేటా సుమారు 40,000 టన్నుల కేర్ట్రిడ్జిలు చెత్తలో పారవేయబడుతున్నాయి. మీ కేర్ట్రిడ్జి ఐదు పౌనులే కావచ్చు - దాన్ని తిరిగి ఉపయోగిస్తే, అది భూభారం కాకుండా ఉన్నట్టే. రిసైకిల్ చేస్తారు కదూ!

ఈ వారపు సిఫారసు




ఇంక ఇంతకంటే పెద్దగా చెప్పక్కర్లేదు. ఒక్క గమనిక - ఈ పుస్తకంలో అతను రాసిన కథల్లేవు, అతనికి నచ్చిన కథలు మాత్రమే ఉన్నై. నాకు చాలా నచ్చేయి.

ఈ వారపు బ్లాగు


పశ్చిమబెంగాలు విశేషాలు చక్కటి ఫొటోలతో సహా చెబుతున్నారు పాపాయి బ్లాగులో. మీరూ ఓ లుక్కెయ్యండి.

Comments

spoorthi said…
పర్యవరనానికి మావొంతుగ మెము చెస్తున్నది ప్లాస్టిక్ వాడకాన్ని పూర్తిగా తగ్గించెసాం. ఇంకా ఇంటి చుట్టుగ చిన్న చిన్న మొక్కలు పెంచడం. ఈ సారి పుస్తకోత్సవంలో నేను కొన్నానండి వంశి గారి పుస్తకం
బోలెడు వివరాలతో కబుర్లు బాగున్నాయండి. తనికెళ్ల భరణి గురించి బాగాచెప్పారు, ఆ మిగిలిన నాలుగు ప్రాణాలు ఎవోకూడా మీ నోటితో చెప్తే వినాలని ఉంది :)
వీడీయోచాలా బాగుంది, చివరిలో ఉపయోగించిన వయొలిన్ బిట్ Pachelbel's Canon అనే నా ఫేవరెట్ ఆల్బం లోనిది చాలా రోజుల తర్వాత మళ్ళీ వినిపించినందుకు నెనర్లు.
హ్మ్ వరిఅన్నం గోధుమలు ఇంచుమించు ఒకటే అంటారు, అది సరే మరి వీటికన్నా ఇంకా బెటర్ పదార్థాలేమిటో కూడా కనీసం తరువాయి కబుర్లలో చెప్తే సంతోషిస్తాం.
కేట్రిడ్జ్ రీచార్జ్ గురించి మొదటిసారి వింటున్నాను మంచి సమాచారం. వంశీకి నచ్చిన కథలు క్యూలో ఉంది కథలు బాగున్నాయంటారు అయితే తరువాయి అదే అందుకుంటాను.
మురళి said…
'వంశీకి నచ్చిన కథలు' లో వంశీ తొలి కథ 'నల్ల సుశీల' తో పాటు రవీంద్రుడి కథకి వంశీ స్వేచ్చానువాదం 'అక్కడి రాళ్ళు ఆకలితో ఉన్నాయి' కథలు ఉన్నాయని గమనింప ప్రార్ధన.. మరిన్ని వివరాలు త్వరలో :-) :-)
ఆరోగ్యం:
నా ఆహారంలో పచ్చి కూరగాయలూ, పళ్ళూ తెగపెంచేసాను. అన్నంలో కూరకు బదులుగా ఉడికించిన కూరగాయల్లో కూరలు వేసుకొని స్పైసీ స్పైసీగా కూరగాయలు లాగించేస్తున్నానోచ్. వరి కానీ గోధుమకానీ తినడం వారాంతం లగ్జరీ అయిపోయింది నాకు. అలా అని బొజ్జ, బరువు తగ్గిస్తున్నానని కాదు :( ఎక్సెప్షన్స్ ఎక్కువవుతున్నాయి మరి!
బాగా చెప్పారు.
అన్నం తింటే ప్రమాదం అనుకున్న వాళ్ళు చాలా మంది చపాతీలు, గోధుమ రవ్వ ఉప్మా, లేక ఇంకా రకరకాల సీరియల్స్ తినేస్తూ, చాలా డయట్ చేస్తున్నాం అనుకుంటున్నారు. అలాగే పల్లీలూ, కొబ్బరీ, , నువ్వుల లాంటివి తింటే ఏదో అయిపోతుందన్నట్టు గా మాట్లాడుతూ 0% trans fat ఉన్న నూనెలు తాగుతున్నారు..
Anil said…
చాలా మందికి నచ్చిన కథలే వంశీకి కూడా నచ్చిన కథలైనవి. :)