కబుర్లు - ఆగస్టు 24

అబ్బో, గతవారం చాలా బిజీ ఐపోయింది. బాహ్య ప్రపంచం అంటే ఏవిటో మరిచిపోయేంత బిజీ, చాలా రోజుల .. కాదు, చాలా ఏళ్ళ తరవాత పోయినవారం అనుభవానికి వచ్చింది. అక్కడీకీ, సందు దొరికినప్పుడల్లా మూణ్ణాలుగు బ్లాగులు చదివి ఒకట్రెండు వ్యాఖ్యలు రాస్తూ వచ్చా. కానీ నా టపాలు రాసుకునేందుకు మాత్రం తీరిక చిక్కలేదు.

వేసవి ముగియవస్తున్నదేమో, నాపని మూడు వారాంతాలూ, ఆరు అరంగేట్రాలుగా ఉన్నది. సోమయాజులుగారని పెద్దవారు, చాలా కాలంగా ఇక్కడ కాపురముంటున్నవారు, నాకు మా దేవాలయంలో పరిచయం. విజయవాడ వాణ్ణనో, ఎందుకనో ఆయనకి నేనంటే మంచి అభిమానం. వారి మనుమరాలు చిరంజీవి శిరీష కూచిపూడి రంగప్రవేశం జరుగుతుంటే పిలిచారు పోయిన వారం. గురువు సంధ్యశ్రీ ఆత్మకూరి గారు నా స్నేహితులు కాబట్టి ఆవిడ కూడా పిలిచారనుకోండి. బాగా జరిగింది. ముఖద్వారం దగ్గర అలంకరణ దగ్గరినించీ, ఆడిటోరియంలో రంగాలంకరణ వరకూ ప్రత్యేక శ్రద్ధతో చేసినట్టు స్పష్టంగా తెలిసింది.

కూచిపూడి గురించి, అందులో సోలో ప్రదర్శన గురించి నాకు బొత్తిగా ఏమీ తెలియదు, గనుక నేను శిరీష నాట్యాన్ని విశ్లేషించే సాహసం చెయ్యను. అంశాల ఎంపిక పాతకొత్తల మేలుకలయికగా ఉంది. సంధ్యగారి గురువు వెంపటి చిన్నసత్యంగారి ఆధ్వర్యంలో సమకూరిన రుక్మిణీ కళ్యాణం నాటకం నించి రుక్మిణి ప్రవేశ దర్వుని అభినయింప చేశారు. భుజంగరాయ శర్మగారి కవిత్వం .. సంగీతం కూర్చింది బహుశా పట్రాయని సంగీతరావుగారై ఉండొచ్చు. ఈ అంశం నన్ను బాగా ఆకట్టుకుంది. "ముద్ద గట్టిన వెన్నెలమ్మా, ముద్దు బాలమ్మా, అచ్చపు ముద్దరాలమ్మా" అనే వరుసని పదిసార్లు విశదపరిచి అభినయించడం చాలా బాగా నప్పింది. చివర్లో కుటుంబసభ్యులందరూ విడివిడిగా ధన్యవాదాలు చెప్పబట్టి ఆహూతుల సహనానికి కొంచెం పరీక్ష పెట్టారు కానీ మిగతా అంతా చాలా బాగుంది.

కొన్నాళ్ళుగా నా జీవితంలో ఏర్పడిన సంగీతలేమిని గురించి కొంచెం తీవ్రంగా ఆలోచించి సవరణచర్యలు చేపట్టానని తెలియజెయ్యడానికి సంతోషిస్తున్నాను. ఎప్పటిదో పాత వాక్మేన్ కేసెట్ ప్లేయరు ఇంకా బానే పని చేస్తోంది. దాన్నీ, నా బోషాణంలోంచి ఒక పది రసవత్తరమైన కచేరీల కేసెట్లనీ సతతం అందుబాటులో ఉంచుకుంటూ, చెవులకి బిరడాలు తీసినట్టు మళ్ళీ సంగీతం వింటున్నా. ఇవ్వాళ్ళ పొద్దున ఆరు మైళ్ళ నడకలో వోలేటి వేంకటేశ్వర్లుగారి కచేరీ ఒకటి విన్నా. బేగడలో రాగం తానం పల్లవి. బేగడ మీగడ అంటారు .. అంటే అంత మధురం అన్న మాట. ఈ రాగాన్ని కొంచెం శోధించాలని బుద్ధి పుట్టింది. చేస్తా త్వరలో.

ఇంటొ ఉన్న బుల్లి బుల్లి వినాయకుళ్ళందర్నీ కొలువు తీర్చి, నా చేతుల్తో చేసిన వినాయకుణ్ణి మధ్యలో ప్రతిష్ఠించి, నమక చమకసహితంగా అభిషేకంతోపాటు వరసిద్ధి వినాయకుణ్ణి పూజచేసుకుని ఈ సాయంత్రం ధన్యుణ్ణయ్యాను. పసుపు ముద్దతో చేసిన మా వినాయకుడు ఎంత ముద్దుగా ఉన్నాడో. పోయినేడాది మా యింటి పెరట్లోని బంకమన్నుతో చేశా వినాయకుణ్ణి. ఇలా ఏడాదికో పదార్ధంతో చేసుకుంటు ఉంటే బానే ఉంటుంది, సరదాగా.

ఈ బ్లాగు చదివినవారందరూ సిద్ధివినాయక అనుగ్రహ పాత్రులై వినాయకవ్రతకల్ప ఫలం పొంది, నీలాపనిందలకు గురికాక, ఇష్టకామ్యార్ధసిద్ధులు కాగలరు!

Comments

టదివినవారే కాదు, రాసినవారు కూడా! :-)

ఆరుమైళ్ల నడకా?! అంటే దాదాపు పది కి.మీ. అదీ సోమవారం పొద్దున్నే!! భరతనాట్యం చేసేవాళ్లకు ఆ మాత్రం స్టామినా వుండటంలో ఆశ్చర్యమేముందిలెండి. నేను రెండుమైళ్లు పరుగెత్తేసరికి ఫినిష్.
రాంనాథా .. అందుకే నేను పరిగెత్తను, నడుస్తాను. :) 6 మైళ్ళు నడిచింది ఆదివారం ఉదయం. సాధారణంగా ఈ సోమవారపు పోస్టుని ఆదివారం సాయంత్రం రాస్తాను. అందుకని ఈ నిన్న-ఇవ్వాళ్ళ-రేపు లలో కోంచెం కంఫ్యూజను. ఇవ్వళ్ళ (సోంవారం) కూడా నడిచాను కానీ ఆరు కాదు. మూడున్నర, నాలుగు అయుండొచ్చు.
తృష్ణ said…
క్రితం ఏడాది మీరు చేసానని మీ బ్లాగ్ లో పెట్టిన మట్టి వినాయకుని బొమ్మ ఫొటో గుర్తుండండి..
మురళి said…
'ప్రవేశ దరువు' అంటారు.. 'దర్వు' టైపో అనుకుంటా... వినాయక చవితి శుభాకాంక్షలు..
మురళి, అవునండి, ప్రవేశ దరువు. టైపాటు పడిందక్కడ.
నేను కూడా కాస్త పరుగులు ఆపి వేగంగా నడవటానికి, జాగింగ్ కీ మారానండి. చాలావరకు ఈ కవితలకి స్పందనలు ఆ నడకలో మనసు అవలోకించే అంశాలని బట్టే వస్తాయి. నాట్యం గురించి చిన్న వార్త చదివినా ఏదో ఆనందం. playdoh తో వినాయకుడిని తీర్చి దిద్ది, పూసలు, nail polish తో అలంకరించింది ఒక స్నేహితురాలు. అదీ బాగుంది. మీకు కూడా ఆలస్యంగానైనా సదా ఆయురారోగ్యాలతో, సుఖశాంతులతో వుండాలని ఆకాంక్ష అందిస్తూ...
Usha, thank you. Yes, walk is much better. And it is a great trigger for ideas and creativity for me too.
Bolloju Baba said…
నే రాదామనుకొన్న పాయింటు రానారే గారు రాసేసారు. మా ఇంటి దగ్గర్లోని పార్కులో మూడు రౌండ్లు వేసే సరికి అవుట్. (సుమారు మూడు కి.మీ). ఆరు మైళ్లే.

మీకు రాగాలపై మంచి పట్టు ఉన్నట్లుంది. ప్రముఖ రాగాలు సినిమా పాటలలో ఏవిధంగా కూర్చబడ్డాయి అనే విషయంపై ఒక సీరిస్ వెయ్యండి గురువుగారూ. ఓ నాలుగైదు పాటల లింకులతో. ఎప్పటినుంచో తెలుసుకోవాలని ఆశక్తి.

బొల్లోజు బాబా
@బాబా, సంగీతం గురించి అడపాదడపా రాస్తూనే ఉన్నాను, ఉంటాను. సినిమాపాటల్లో రాగాల్ని గురించి మాత్రం నాకు తెలియదు, ఏవో ఒకట్రెండు తప్ప. ఈమాటలొ రోహిణీప్రసాదుగారూ, విష్ణుభొట్ల లక్ష్మన్న గారూ కొన్నాళ్ళ పాటు రాగాల మీద మంచి వ్యాసాలు రాశారు, వాటిల్లో ఆయా రాగాల సినిమా పాటల లింకులు కూడా ఇచ్చారు.