Tuesday, December 30, 2014

మెక్సికో అప్సరస

సన్ పత్రికలో ఒక కథనం

నాకు పదిహేనేళ్ళప్పుడు మా కుటుంబం అంతా మెక్సికో దేశ రాజధాని మెక్సికో సిటీకి ఒక వారం పాటు వెకేషన్‌కి వెళ్ళాం - మా నాన్న, మా మారుటి అమ్మ, నా ఇద్దరు తమ్ముళ్ళు, నేనూ.

ప్రయాణంలో ఉండగా మా నాన్న మాకు పదే పదే చెప్పారు, అక్కడి మంచి నీళ్ళు తాగవద్దని. తాగితే గనక మాంటజూమా పగ అనబడే భయంకరమైన పొట్టనెప్పి విరేచనాల జబ్బు పట్టుకుంటుందని. దానికి తగినట్టుగానే మేము చాలా జాగ్రత్తగా డబ్బాల్లో సీసాల్లో అమ్మే సోడాలు మాత్రమే తాగుతూ వచ్చాం ఐదురోజుల పాటు. రకరకాల ప్రదేశాలు చూశాం. రాత్రుళ్ళు నేనూ, నా తమ్ముళ్ళూ మా గదిలో ఎకసెక్కాలాడుకుంటూ, సరదా యుద్ధాలు చేసుకుంటూ ఆనందంగా గడుపుతున్నాం.

ఐదోరోజు రాత్రి భోజనానికి ఒక మంచి రెస్టారెంటుకి తీసుకెళ్ళారు మా నాన్న. అక్కడ ఒక చిన్న స్టేజి. దాని మీద ఒక చిన్న మ్యూజిక్ బేండ్. ఆ బేండ్ లో పాట పాడుతున్న అమ్మాయి .. బహుశా పాతికేళ్ళుండచ్చు. చాలా అందంగా ఉన్నది. అంతకన్నా అందంగా అలంకరించుకున్నది. భుజాలు లేని ఎర్ర రంగు శాటిన్ గౌనులో, అలల్లా ఎగిసిపడుతున్న నల్లటి కురులతో అప్సరసలా కనబడుతోంది, కిన్నెరలా పాడుతోంది.

మా నాన్నే అందరి తరపునా ఆర్డరిచ్చారు. నా ముందు పెట్టిన వంటకం .. దాని పేరేమిటో, అందులో ఏముందో కూడా పట్టించుకోకుండా యాంత్రికంగా నముల్తూ ఉన్నా .. ఆ అప్సరసనే చూస్తూ. కొంత సేపయ్యాక ఆమె పాట పాడుతూనే స్టేజి దిగి ఒకటి రెండు టేబుల్స్ దగ్గర ఆగుతూ మా టేబుల్ దగ్గరికి వచ్చింది. నా కళ్ళు ఆమె చూపుల వలలో చిక్కుకు పోయాయి. ఆమె పాడుతున్న స్పానిష్ గీతం తేనెలా మధువులా నన్ను మంత్ర ముగ్ధుణ్ణి చేసేస్తోంది. నా మీద ఆమె కలిగిస్తున్న ప్రభావాన్ని ఆమె కూడా గ్రహించిందేమో అన్నట్టు టేబుల్ దగ్గరున్న మిగతా వారందరినీ వదిలేసి ఆమె నన్నే చూస్తూ పాడుతోంది. మా నాన్నా అమ్మా ఈ తమాషా అంతా చూస్తూ ముసిముసిగా నవ్వుకోవటం నాకు కనిపిస్తూనే ఉంది. ఇటు పక్కన నా తమ్ముళ్ళిద్దరూ నా అవస్థ చూస్తూ, పైకి ఏమీ అనకపోయినా .. రాత్రికి నీ పని పడతాములే .. అన్నట్టు తమలో తాము సైగలు చేసుకోవటమూ నా దృష్టిని దాటి పోలేదు. కానీ ఆమె పరిచిన మాయాజాలం మబ్బులా నన్నావరించి పోయింది. పాట ముగిస్తూ ఆమె నా ఎడమచేతిని తన చేతిలోకి తీసుకుని చిన్నగా తట్టి తిరిగి తన స్టేజి మీదికి వెళ్ళిపోయింది.

ఆ రోజు రాత్రి మా హోటలు గదిలో నా తమ్ముళ్ళ ఎకసెక్కాలకంటే ఎక్కువగా బాధిస్తూ .. నా కడుపులో పోట్లు. వెంటనే టాయిలెట్టుకి పరిగెత్తాను. అప్పుడు గ్రహించాను .. ఆ అప్సరస మాయలో పడి అక్కడ గ్లాసులో పెట్టిన నీళ్ళు తాగేశానని.

ఆ రాత్రి మాంటెజూమా నా మీద పూర్తిగా పగ తీర్చుకున్నాడు.

Friday, December 19, 2014

మోహన రామా - రామావతార యోగ రహస్యము



త్యాగరాజస్వామివారు వాల్మీకి మహర్షి అవతారమని చాలా మంది భావిస్తుంటారు. రామాయణం మొత్తాన్ని తన కృతులలో తిరిగి రచించారని చెబుతుంటారు. మనకి లభిస్తున్న కృతులలోనే చూస్తే ఎన్నో రామాయణ ఘట్టాలు కనిపించడం వాదనకి కొంత బలం చేకూరుస్తున్నది. రామాయణం సంగతేమోగాని, ఒక్క కృతిలో మాత్రం స్వామివారు రామావతారం జరగడానికి వెనుక కథని అతి మనోహరంగా చెప్పారు. అదే మోహనరాగంలో చేసిన మోహనరామా అనే కృతి.
మోహన రామా, చంద్రుణ్ణి కూడా జయించే అందమైన ముఖం కల రామా, మాతో ముద్దుగా పలకవయ్యా. మొదటి దైవమైన రామయ్యా, నువ్వే కావాలి అనే కోరిక మొలకెత్తినదయ్యా!
భూమిపై నీవు అవతారమెత్త బోయే శుభసందర్భం ఆసన్నమైనదని తెలిసి, కిన్నర కింపురుషాదిగా గల తేజోమూర్తులు, ఇంద్రుడు, బ్రహ్మ, సూర్యుడు, చంద్రుడు మొదలైన దేవతలు అందరూ వివిధ రూపాలతో పక్షులుగా, మృగాలుగా, వానరులుగా, తాముకూడా భూమిపై పుట్టి, నీపై ప్రేమలో కరగి పోతూ చాలా కాలం పాటు మైమరచి నిన్ను సేవిస్తూ ఉండిపోయారయ్యా! కొండ మీద కొలువయ్యున్న సీతాపతే, ధన్యుడైన త్యాగరాజునికి వరములిచ్చేవాడా! సకల సృష్టినీ మోహింపజేసే రామయ్యా!
స్థూలంగా చెప్పుకుంటే, కృతి అర్ధం ఇది. భక్తిభావంతో కొంచెం లోతుగా చూస్తే త్యాగరాజస్వామికి మాత్రమే సాధ్యమయ్యే ఒక భావసుందరమైన చమత్కారం కనబడుతుంది. రావణ సంహారం మానవరూపంలోనే జరగాలి, అందుకు శ్రీమన్నారాయణుడు మనిషిగా భూమి మీద జన్మించాలి అని పురాణ కథ. దేవతలంతా కూడా భూమి మీద జటాయువు, జాంబవంతుడు, సుగ్రీవుడు ఇలా వివిధ రూపాలలో పుట్టారు స్వామికి సహాయంగా. వాళ్ళ పిచ్చికానీ, ఎంత మానవ రూపం ఎత్తినా, దేవదేవునికి వీళ్ళ సహాయం కావాలా? వాళ్ళకి చేతగాకనే కదా ఆయన్ను శరణు జొచ్చింది! మొదటిదైవమా అని సంబోధించి ఆయన ఈశ్వరత్వాన్ని సుస్థిరం చేశారు త్యాగరాజు. అసలు విషయం ఏవిటంటే ఆయన వైకుంఠంలో పాలసముద్రంలో శేషతల్పశాయిగా పవళించి ఉన్నప్పుడు వీళ్ళందరూ ఆయన చుట్టూ ఉండి, ఆయన్ను కీర్తిస్తూ, ఆయన కరుణా కటాక్షపు జల్లుల్లో తడుస్తూ హాయిగా ఉండేవాళ్ళు. ఇప్పుడాయన వైకుంఠాన్ని వదిలి భూమి మీదికి వెళ్ళాలంటే మరి వీళ్ళగతేమి కాను! దేవుళ్ళ కాలమానం ప్రకారం మానవ జన్మ కాలపరిమితి చాలా చిన్నదే అయినా, కాస్త వ్యవధి కూడా వాళ్ళెవరూ స్వామిని విడిచి ఉండడానికి ఇష్టపడక వాళ్ళందరూ కూడా భూమి మీద వివిధ రూపాలలో పుట్టారు, స్వామిని సేవించుకుందామని.
పైగా ఆయన మోహన రాముడు. పుంసాం మోహన రూపాయ అని వర్ణించాడు వాల్మీకి మహర్షి శ్రీరాముణ్ణి. సమ్మోహన పరచడం శ్రీరాముడి ముఖ్యమైన లక్షణాల్లో ఒకటి. అది కేవలమూ భౌతికమైన అందం గురించి కాదు. తన మాటలతో, చేతలతో, ప్రవర్తనతో మొత్తంగా ఆయన మనల్ని ముగ్ధుల్ని చేసేస్తుంటాడు. సమ్మోహన లక్షణానికి దేవతలు కూడా అతీతులు కారని త్యాగరాజస్వామివారి భావం. ఇంకో వేదాంత పరమైన విషయం ఏవిటంటే విష్ణువు అంటే సర్వాంతర్యామియైన పరమేశ్వర భావం. ఇందుగల డందులేడని సందేహము వలదు! అట్లాంటి నిరాకార నిర్గుణ తత్త్వం ఇప్పుడు భూమి మీద సగుణ సాకార రూపమై శ్రీరామునిగా వెలిసింది. సగుణ రూపం అనగానే దాంట్లో ఏదో ఒక వంక, ఒక లోపం ఉండకుండా ఉండదు. కానీ ఈయన మాత్రం సగుణ రూపం ధరించినా అటువంటి వంకలూ శంకలూ ఏవీ లేకుండా మోహన రాముడై వెలుగొందడం ఆయన సాక్షాత్తూ పరమాత్మ కావడం వల్లనే చెల్లింది. అలా అనుపల్లవిలో ముందు మోహన రామా అని పిలిచి, వెంటనే మొదటి దైవమా అనటం శోభించింది.
ఇదంతా ఇలా ఉండగా, ఇందులోనే యోగ విద్య గూఢార్ధముగా ఉన్నది.
సృష్టినంతటినీ నడుపుతున్న చేతనా శక్తి మానవుడిలో వెన్నెముక కింది చివర కుండలినీ రూపములో నిద్రాణమై ఉన్నది. ఇది మూలాధార చక్రం. పంచ భూతములలో భూమి దీనికి ఆశ్రయమైనది. చేతనా శక్తియే సర్వాంతర్యామి కూడా కాబట్టి ఇదే మొదటి దైవం. మానవుడు సాధకుడైనప్పుడు మూలాధారమనే సారవంతమైన భూమిలో మొదటి దైవము పైన ప్రేమ నాటుకుని మొలకెత్తుతుంది. పైకి ఎదుగుతున్న మొలక వివిధ చక్రాలను దాటుతూ పయనిస్తుంది. బ్రహ్మ, సూర్య, చంద్రాది దేవతలు ఆయా చక్రాలకు అధిష్ఠాన దేవతలు. వారూ ఎదుగుతున్న, పైకి పాకుతున్న ప్రేమ అనే మొలకను వృద్ధి చేస్తూ ఉన్నారు. అలా దేవతల సహాయంతో ఆరు చక్రాలలోనూ జాగృతమైన కుండలినియే శక్తి స్వరూపిణియైన సీత. సీతావరుడైన శ్రీరామచంద్రుడు గిరిపై కొలువున్నాడు అంటే సహస్రార కమలం వికసించింది అన్నమాట. పరమ పదాన్ని చేరే ప్రయత్నంలో సాధకుడే కాదు, ఆయా చక్రాలను ఆశ్రయించి ఉన్న దేవతలు కూడా కరగి పోయి పరమాత్మ తత్త్వంలో లీనమై పోతున్నారు. ఇదంతా ముందు మూలాధారములో ప్రేమ బీజం పడి మొలకెత్తి, దాన్ని అత్యంత శ్రద్ధతో చిరకాలం పోషించినప్పుడే సాధ్యపడుతుంది సుమా! మనలను మన మానానికి వదిలివెయ్యకుండా ఎప్పటికప్పుడు "నీవు చెయ్యవలసిన పని ఇది" అని మనలను ప్రేరేపించే ఆకర్షణే మోహన రాముడు.

విధంగా పైకి పురాణకథను చెబుతున్నట్టు కనబడుతూ త్యాగరాజస్వామి యోగమార్గము కూడా భక్తి మార్గము తోటిదేకాని దానికి భిన్నమైనది కాదని మనకి కృతిద్వారా బోధిస్తున్నారని నాకు తోచినది.