Monday, June 28, 2010

కబుర్లు - జూన్ 28

బీపీ .. గల్ఫ్ తీరవాసులకి టోపీ .. ఒబామా ముక్కోపి .. చూసేవాళ్ళకి తలనెప్పి!

కట్రీనా బీభత్సాన్నించి ఇప్పుడిప్పుడే కోలుకుంటున్న న్యూఆర్లీన్స్ ఇంకా గల్ఫ్ తీర వాసులపాలిట ఇంకోశాపం. అంతేకాదు, ఈ ఉపద్రవం లెక్కకు మిక్కిలి జంతు వృక్షజాతులపాలిటి మృత్యుపాశం అయి ఉచ్చు బిగుస్తున్నది. ఎవడు ఎవడికి ఎంత తొందరగా నష్టపరిహారాలు చెల్లిస్తారో పక్కన పెట్టండి, ప్రకృతిమీద ఎంత విధ్వంసం? ఎంత డబ్బు ఖర్చు పెట్టినా, ఎంత సముద్రపునీళ్ళని వడబోసినా పూర్వ స్థితి రాగలదా?

ఇదిలా ఉండగా అటు భారత్‌లో భోపాల్ యూనియన్ కార్బైడు మీద తీర్పు. ఎంత హాస్యాస్పదం! ఎంత ఘోరం! ఆ తీర్పు రాసేటప్పుడూ, కోర్టులో చదివేటప్పుడూ ఆ జడ్జీకి కాస్థ సిగ్గైనా వెయ్యలేదా? కానీ అధికార వర్గాలు చూపించే మొండిచేతుల్ని చూడ్డానికి భోపాల్ విషవాయు బాధితులు అలవాటు పడిపోయారు. అంచేత ఈ సరికొత్త అవహేళన బహుశా వాళ్ళని పెద్దగా ఇబ్బంది పెట్టిందని అనుకోను. కానీ ఇన్నేళ్ళల్లోనూ వాళ్ళు తమ పోరాట స్ఫూర్తినీ, నిశ్చయాన్నీ కోల్పోలేదు. ఇప్పుడూ కోల్పోరు. నాకా నమ్మకముంది.

ఏదేమైనా, ఎటువంటి విషయాన్నైనా విని/చదివి తట్టుకునే స్థితప్రజ్ఞత ఉంటేనే వార్తలు తెరవాలి - ఆ స్థితప్రజ్ఞతలేదని ఏమాత్రం సందేహంగా ఉన్నా వార్తలకి దూరంగా ఉండడం మంచిదల్లే కనిపిస్తోంది.

ఈ మధ్యన మా యీంట్లోనూ శాటిలైట్ టీవీ ప్రవేశించింది. క్రమం తప్పకుండా వివెల్ అల్ట్రాప్రో సూపర్ సింగర్ ఫైవ్ చూస్తున్నా - పొందండి టోటల్ గేరంటీ, పోషణా సంరక్షణా మరియూ మాయిఛ్ఛరైజేషన్!!! టింగ్ టింగ్. అక్కడక్కడా చిరాకనిపించినా, వోలుమొత్తం మీద ఈ పాటలపోటీ నాకు నచ్చేసింది. దీన్ని గురించి చెప్పాల్సిన కబుర్లు చాలా ఉన్నై అంచేత, విడిగా ఓ టపారాస్తా. లంగరయ్య సాగర్ గురించి రెండు మాటలు - నెల్లాళ్ళ కిందట చూడ్డం మొదలెట్టినప్పుడు వీడెవడ్రా నాయనా అని దిగాలు పడ్డాను, కానీ రాను రాను పిలగాడు పదును తేరాడు.

మొన్నటి పుస్తకాల బంగీలో చేతికందిన ఒక అపురూపమైన పుస్తకం "మా నాన్నగారు". సీనియర్ సాహితీవేత్త డా. ద్వానా శాస్త్రిగారు కూర్చిన సంకలనం. కీర్తిశేషులైన అరవైరెండుమంది సాహితీ ప్రముఖుల జీవిత విధానాలు అని పేర్కొన్నారు అట్టమీద. తమ తమ తండ్రులని గురించి ఒక కూతురుగాని కొడుకుగానీ క్లుప్తంగా చెప్పుకొచ్చిన 4-6 పేజీల జీవిత విశేషాలు. ఏదో పత్రిక్కి వ్యాసం రాసినట్టు కాక చాలా వ్యక్తిగత దృక్పథంతో ఆత్మీయంగా ఉన్నాయి రచనలన్నీ. తెలుగు సాహిత్యంలో అమ్మకి పద్యంలోనూ వచనంలోనూ చాలానే నీరాజనాలొచ్చినాయి ఇలా తండ్రుల్ని తలుచుకోవడం, అదీ చాలా చక్కగా మంచి అభిరుచితో తీసుకురావడం సంతోషం కలిగిస్తున్నది. ద్వానా శాస్త్రిగారికి అభినందనలు. వెల కొంచెం ఎక్కువే. రూ. 400. ప్రతులు విశాలాంధ్ర అన్ని బ్రాంచీలలోనూ. లేదా ద్వానాశాస్త్రిగారిని నేరుగా సంప్రదించ వచ్చు - 98492 93376

వార్త దినపత్రిక ఆదివారం అనుబంధం అందిస్తున్న ప్రత్యేకం మళయాళ రచయిత ఎం టి వాసుదేవన్ నాయర్ తో ఇంటర్వ్యూ.

సాక్షి సంస్థలో విలేఖరిగా పనిచేస్తున్న పూడూరి రాజిరెడ్డి గారు చాలా కాలంగానే చక్కటి బ్లాగు నిర్వహిస్తున్నారు. ఆయన కథ ఒకటి ఆయన బ్లాగులోనే; అక్కడే ఆయన చెప్పిన వారి వూరి ముచ్చట కూడా. ఆయన రాసిన మధుపం గురించి పత్రికావర్గాల్లో మంచి టాక్ వచ్చింది. పుస్తకంలో ఒక సమీక్ష. మీరూ ఓ లుక్కెయ్యండి.

Friday, June 25, 2010

అర్ధాంతరపు కబుర్లు

చెప్పాపెట్టకుండా మాయమైపోయినందుకు ఈ బ్లాగు క్రమం తప్పకుండ చదివే బ్లాగ్మిత్రులందరినించీ క్షమాపణ వేడుతున్నాను. అకస్మాత్తుగా అనేక పనులు ఒక్కసారే చుట్టుముట్టి కొంచెం ఊపిరిసలపని పరిస్థితి ఏర్పడింది. మళ్ళీ సర్దుకుంటోంది ఇప్పూడిప్పుడే. ఇకనించీ తిరిగి సోమ గురువారాల్లో క్రమంతప్పకుండా టపాలు ప్రచురిస్తాను. తెలుగు పాఠాలకి మాత్రం ప్రస్తుతానికి శలవు (ఎంతైనా వేసంకాలం కదా!). కొత్తపాఠాల్ని తయారుచేసేంత తీరిక ఓపిక ప్రస్తుతానికి లేవు.

నాతో నెట్‌లో మాత్రమే టచ్‌లో ఉండే మిత్రులందరికీ ఒక గమనిక. నేను జీటాక్‌లోనో, ఫేస్‌బుక్‌లోనో కనబడక పోయేసరికి కొందరు మిత్రులు నేనేదో వారిని block చేశానని భావిస్తున్నట్టు తెలిసింది. అలాంటిదేమీ లేదు. నేనెవర్నీ block చెయ్యలేదు. కొంతకాలంగా ఫేస్‌బుక్ ఒక చిరాకుగా మారింది, అందుకని దాంట్లో ఫీచర్లన్నీ అచేతనం చేశాను. సమయాభావం వల్లనే జీటాక్‌లో కూడా లాగిన్ అవడం లేదు. అంతే విషయం.

నేను ఆబ్సెంటయిన ఈ నాలుగువారాల్లోనూ ఎన్నెన్నో కొత్త సంఘటనలు, వార్తలు, స్వంత అనుభవాలు .. ముచ్చటించుకుందాం అన్నీ తీరిగ్గా.

ఒక్క మాట మాత్రం చెప్పేసి ప్రస్తుతానికి ఈ టపా ముగిస్తా. పాలపిట్ట అనే కొత్త మాసపత్రిక ప్రస్తావన బ్లాగుల్లో చూసే ఉంటారు. ఫిబ్రవరిలో తొలిసంచిక వెలువడింది. తొలి నాలుగు సంచికలూ నాకు నిన్ననే అందాయి. ఒకే ఒక్క మాట - సర్వాంగసుందరం!!! సంతృప్తి కలిగించే ఒక మంచి తెలుగు పత్రిక చదవాలి అనుకుంటే సందేహించకుండా ఈ పత్రికకి చందా కట్టండి! ఎందుకనో ఈ పత్రిక పంపిణీ వ్యవస్థ ఇంక పటిష్ఠంగా ఏర్పడలేదు. అందుకని కొత్త సంచిక విడుదల అయినప్పుడల్లా మిస్సవకుండా పొందడానికి చందా కట్టడంకంటే మంచి మార్గం లేదు. ఇదేదో పత్రికని బతికించండి అన్న వేడికోలుగా చెప్పట్లేదు నేను. ఉత్తమ అభిరుచి గల పాఠకులు ఒక మంచి పత్రికని మిస్సవకూడదనే తపనతో చెబుతున్నాను. తప్పక చందాకట్టండి.
వివరాలకు
ఎడిటర్, పాలపిట్ట మాసపత్రిక
House No 16-11-20/6/1/1,403
విజయ సాయి రెసిడెన్సీ
సలీం నగర్, మలక్ పేట్
హైదెరాబాద్-500036
ఫోను-9848787284


సోమవారం నాడు కబుర్లతో కలుసుకుందాం. వారాంతపు ఆనందం మీసొంతం!!