కబుర్లు - డిశంబరు 29

వారాని కొక్కసారి ఒక పేజీడు వాక్యాల్ని పండించడం ఏం పెద్ద కష్టం?
కానీ ఒక్కోసారి అదే ఎవరెస్టు పర్వతారోహణం చేసినంత కష్టమై పోతూ ఉంటుంది.
అనాయాసంగా పేజీలకి పేజీలు రాసి పడేసే సమర్ధుల్ని చూసి అసూయ కుట్టేస్తుంటుంది.
ఖాళీగా ఉన్న కంప్యూటర్ తెరా, తెల్ల కాగితమూ ఒక్కలానే వెక్కిరిస్తాయి, కానీ మూడ్ మాత్రం ససేమిరా రానంటుంది.
బాబ్బాబు, ఈ మూడ్, కిలోల్లెక్కన ఏ బజారులోనన్నా దొరుకుతున్నదేమో, చెప్పి కాస్త పుణ్యం కట్టుకోండి.

డిశంబరు 14 నుండీ జనవరి 13 వరకూ ధనుర్మాసం అంటారు. దక్షిణాది హిందువులందరికీ, ముఖ్యంగా వైష్ణవులకి ఇది పవిత్రమైన మాసం. ఈ నెల రోజులూ ఉదయాన్నే తిరుప్పావై పారాయణ చెయ్యడం శుభం చేకూరుస్తుందని నమ్ముతాము. చిలమకూరు విజయమోహన్ గారు రోజుకో పాట చొప్పున, తమిళ మూలమూ, తెలుగు అనువాదమూ తన బ్లాగులో ప్రచురిస్తున్నారు, అభినందనలు.

డిశంబరు నెల తెలుగు బ్లాగులకి కూడా బాగానే పవిత్రమైనదిగా పరిణమించింది. చాలా సంతోషం. ముందుగా తెలుగుబ్లాగర్ల దినోత్సవాన్ని పురస్కరించుకుని ఈ-తెలుగు ఆధ్వర్యంలో హైదరాబాదు బ్లాగర్లందరూ కలుసుకోవడం, అటుపై కూడలి చాట్లో అంతర్జాతీయ సమావేశంలో పాతిక ముప్ఫై మంది బ్లాగర్లు సమావేశం కావడం మంచి స్ఫూర్తి నిచ్చాయి. ఈ రెండు సమావేశాల నించీ కొన్నైనా కార్యాచరణ ప్రణాళికలు పుట్టే ఉంటాయి. వాటిని క్రోడీకరించి అందరి దృష్టికీ వచ్చేట్టుగా ఉంచితే బాగుంటుంది. అరిపిరాల సత్యప్రసాద్ గారు ఆ దిశగా కొంత కృషి చేస్తున్నట్టు కనబడుతున్నది

హైదరాబాదు సమావేశం నించి ఉద్భవించిన ఒక అద్భుతమైన ప్రయత్నం మన వాళ్ళు పుస్తక ప్రదర్శనలో పాలు పంచుకోవడం. ఈ ప్రయత్నంలో చురుగ్గా పాల్గొన్న బ్లాగు మిత్రులందరినీ పేరు పేరునా అభినందిస్తున్నాను. సుమారు రెండేళ్ళ పైగా సాగుతున్న ఈ బ్లాగు ప్రయాణంలో, అర్రె నేనూ అక్కడ ఉంటే బాగుణ్ణే అనుకున్న సందర్భాలు చాలానే ఉన్నాయి కానీ, ఈ సందర్భంలో మాత్రం .. ఈ సందోహంలో పాలు పంచుకుంటూ నేను కూడా అక్కడ లేనే అనే బాధ ఎంత తీవ్రంగా ఊపేసిందో చెప్పలేను. నేను టూరులో ఉండి కూడా, ప్రతి రోజూ రాత్రి మజిలీకి చేరగానే ముందు శ్రీధర్ డెయిలీ రిపోర్టు చదవడం కోసం నెట్ వెతుక్కున్నాను అంటే అతిశయోక్తి కాదు.

ఈ సత్సమయంలో ఒక ప్రత్యేక వ్యక్తిని గురించి కొంచెం చెప్పుకోవాలి. దూర్వాసుల పద్మనాభం గారు. అప్పుడప్పుడూ ఈ-తెలుగు నివేదికల్లో వారి పేరు వినడం, వారు నిర్వహించే తెలుగు గ్రీటింగ్స్ సర్వీసుని అప్పుడప్పుడూ వాడుకోవడం మినహా, వారితో నాకు పరిచయం లేదు. తెలుగు బ్లాగర్ల దినోత్సవం సందర్భంగా తన బ్లాగులోనూ, తెలుగు బ్లాగు గుంపులోనూ, చెర్నాకోల ఝళింపు లా చురుక్కుమనే టపా ఒకటి రాశారు, తెలుగు బ్లాగరుల్లారా మేల్కోండి, మీ భాషకోసం మీరుకూడా ఏమన్నా చెయ్యండి అంటూ. తన మాటల్నే చేతలుగా నిలబెట్టి, పుస్తక ప్రదర్శన జరిగినన్నాళ్ళూ అవిరళంగా శ్రమించారు. ఎవరైనా వారి కృషిని కొనియాడితే ఒక చిర్నవ్వు నవ్వి మళ్ళీ పనిలో మునిగి పోయారు. పూని యేదైన ఒక్క మేల్ కూర్చి జనులకి చూపవోయ్ అన్న మహాకవి ప్రబోధానికి మానుష రూపం పద్మనాభం గారు. అయ్యా, పద్మనాభం గారూ! పెద్దవారు. ఇక్కణ్ణించే రెండు చేతులూ జోడించి నమస్కరిస్తున్నాను.

మొత్తానికి ఈ సందోహం అంతా, కొత్త వారిని కంప్యూటర్లో తెలుగు వాడకానికీ, తెలుగు బ్లాగుల వైపుకీ ఆకర్షించడంతో పాటు, కాస్త పాతబడి చప్పబడుతున్న బ్లాగరుల్లో కూడా కొత్త ఉత్సాహాన్ని ఇంజెక్ట్ చేసినట్టుంది. సంతోషం. ఈ ఉత్సాహపు పొంగు చల్లారనివ్వకండి. మంచి టపాలు రాస్తుండండి.
మూడ్ ఎక్కడన్నా కిలోల్లెక్కన దొరుకుతున్నదేమో తెలిస్తే మాత్రం నాకు చెప్పండేం?

Comments

బద్దకం ఎక్కువైతే మూడ్ ఎలా వస్తుంది?? చలి కాలం కదా అందుకే మీకు అలా అనిపిస్తుంది. మేము కూడా మీ కబుర్ల కోసం మీ బ్లాగు ఎన్నిసార్లు తొంగి చూసామో??
Purnima said…
హహహ.. మూడ్‍ని కిలోల కొద్దీ కొంటారా? బాగుంది. మాంచి బేరం దొరికితే నాకూ చెప్పండి. :-)

ఇక పుస్తక ప్రదర్శనలో మన స్టాల్ ను విజయవంతంగా నిర్వహించిన వారికి శతకోటి దండాలు. అలానే విజయవాడలో కూడా విజయవంతం కావాలని కోరుకుంటున్నాను.

బైదవే.. కిల్లోల్లెక్క బద్ధకాన్ని అమ్మే ప్లాను వర్క్ అవుట్ అవుతుందా అని ఆలోచిస్తున్నా! ;-)
క్షమించండి. నాకు నచ్చింది మీకు నచ్చాలని లేదు కదా! అయినా ఎందుకో నా వల్ల మరొక మనిషి బాధ పడటం నాకిష్టం లేదు. మరెవరూ మీలా బాధ పడకూడదని పోస్ట్ తొలగించాను. నా బ్లాగ్ లో నచ్చిందని మీరు చెప్పడానికి ఎమిలేవేమో కాని ఎవరూ నా భావాలను చదివి బాధ పడకూడదు. ఎందుకంటే నేను మనిషిని.
యోగి said…
సరే మీరింతగా అడుగుతున్నారు కాబట్టి... $372.45/ఒక టపాకి సరిపోయే మూడ్. ఫిక్సిడ్ రేట్, నో బేరం.. ఒకేనా? :P
Ramani Rao said…
బ్లాగర్స్ సందడి పండగ ప్రవాస బ్లాగర్లని కూడా మనసు కట్టిపడేసేలా చేసిందన్నమాట. నిజానికి హైదరాబాదులో ఈ 10 రోజులు బ్లాగర్స్ నవరాత్రులు తరువాత బ్లాగర్స్ విజయదశమిలా గడిచిపోయాయి. విజయవంతం చేసిన ఘనత స్వచ్ఛందంగా నిర్వహించినవారిదే

నాది కూడా ఓ చిన్న రిక్వస్ట్ 'మూడ్' కిలోల లెక్కన దొరికే అడ్రస్ మీకు ఎవరన్నా చెప్తే, మాకు కూడా చెప్పి పుణ్యం కట్టుకోరూ ప్లీజ్!!!
@శృతి .. మీ బ్లాగులో తిరిగి సమాధానం రాశాను.
@యోగి .. మీవంటి అతి తెలివి వ్యాపారులుంటారనే సావీ, కిలోల్లెక్కన బేరమాడుకునేది :)
@పూర్ణిమ .. బద్ధకాన్ని అమ్మెయ్యడం .. ఇది కూడా ఏదో బాగానే ఉంది. కానీ నా సమస్య బధకం కూడ కాదు :(
@జ్యోతి .. చలికాలం మహిమ అని మాత్రం అనకండి. ఎందుకంటే, ఏప్రిల్ చివరి దాకా మాకిది తప్పదు. ఏదో, మీ వంటి వారు అభిమానంతో ఎదురు చూస్తుంటారనేదే నా రచనకి ప్రస్తుతానికి ఇంధనం!
Bolloju Baba said…
యోగి గారికి
ఒకటపాకి చెప్పారు మరి
ఒక కవితకు?
ఒక కామెంటుకు?
ఒక అనానిమస్ కామెంటుకు?
ఒక కవితకు, కామెంటుకు కలిపి ఎంత?
ఒక కామెంటుకు ఒక అనానిమస్ కామెంటుకు కలిపి ఎంత ?
వోల్ మొత్తం ఎంత, ఏవన్నా రిబేట్ ఇస్తారా?
డీల్ సెట్ అయితే తూగోజీ వోల్ మొత్తం మీ చేతుల్లో పెట్టేస్తాను.

సరదాగా
cbrao said…
డిసంబర్ నెల తెలుగు బ్లాగులకు ప్రత్యేకమైన నెలగానే పరిమణించింది. ఈ టపాలో ఫ్లోరిడా కబుర్ల కోసం కూడా చూశాను. ఆ యాత్రానుభవాలు ప్రత్యేకంగా వెలువరిస్తున్నారని తలుస్తాను.
రాధిక said…
బాబా గారూ తూర్పుగోదావరిని మొత్తం ఆయన చేతుల్లో పెట్టేస్తానంటే నేనొప్పుకుంటానేటండి?అంతా మీరే ఇచ్చేస్తే మరి నేనేమి ఇవ్వాలి?ఆయ్...చెప్పండి.తూగోజీ నాది కూడా :) నాకు కిలోలు అవసరం లేదు గానీ ఒక గ్రామున్నా సరిపోద్ది.
Unknown said…
"ఖాళీగా ఉన్న కంప్యూటర్ తెరా, తెల్ల కాగితమూ ఒక్కలానే వెక్కిరిస్తాయి, కానీ మూడ్ మాత్రం ససేమిరా రానంటుంది" ఎన్నోసార్లు నాకూ ఇది అనుభవమే. మీరూ హైదరాబాద్ లో ఉంటే బాగుండేది అని అనేకమార్లు అనుకున్నాను. రోజూ నివేదిక రాయడం బోర్ కొట్టి మానేద్దామనుకున్నా, మీలాంటి పెద్దలు ఫాలో అవుతున్నారంటే హమ్మయ్య సంతోషంగా ఉంది.
బాబా గారికి మనసు యెల్లలు విస్తరిస్తున్నట్టున్నాయి! అయ్యా మీది యానాం అనబడే బుల్లి కేంద్ర పాలిత ప్రాంతం అనుకున్నానే? అకస్మాత్తుగా తుగోజీ వోలు మొత్తమ్మీద ఆధిపత్యం ఎలాగొచ్చేసిందబ్బా? అరబ్బూ వొంటే అని ఒక కథ గుర్తుకొస్తోంది!! :)
యోగి said…
కొత్తపాళీ గారూ - కిలోల లెక్కలా... "అతి తెలివి" యాపారులు ఈ బిజినెస్ అస్సల్ జెయ్యర్! మాదంతా SAS లాగా BAS (Blogging as service) మోడల్ ... :))

బాబా గారు - మీ ప్రశ్నల సమాధానానికి కూడా పైసలైతయ్.
అన్నట్టు తూగోజి వద్దు, మాంచి సీమ డీల్ ఉంటే చూడండి మాట్లాడదాం :)
Unknown said…
kottapALI gArU,
puduccEri vAramtA mImIda katti kaTTE pramAdam ponci undi. tasmAt jAgrata...
(yAnAm vishayamgaa)
Anil Dasari said…
చిరకాల దర్శనం - వారావలోకనంలో. పైనెవరో అన్నట్లు, చలికాల దోషమేనేమో. హైబర్నేటింగా?
హమ్మయ్య మళ్ళీ వచ్చేశారా.. బ్లాగు లోకం లో పుస్తక ప్రదర్శన లో ఇంత హడావిడి జరుగుతుంటే మీరు కబుర్ల ద్వారా కిమ్మనలేదేమా అని ఎదురు చూస్తున్నాను. బిజీ బిజీ అనమాట. అంతే లెండి ఒకో సారి సమయం మూడ్ రెంటికీ పొత్తు కుదరక అలా ఆలశ్యం అయిపోతుంది. నిజమే చలి కాలం హైబర్నేట్ అవడానికి ఇదేమన్నా ఒక నెల తో పోయేదా !!
చూడండి మీ కబుర్ల కోసం ఎంతమంది ఎదురు చూస్తున్నారో!

"మూడ్ ఎక్కడన్నా కిలోల్లెక్కన దొరుకుతున్నదేమో తెలిస్తే మాత్రం నాకు చెప్పండేం":) మరదే అందరి సమస్య. మూడ్ కుదిరినప్పుడు సమయం దొరకదు, సమయం ఉన్నప్పుడు మూడ్ రాదు!
చాలా రోజుల నుండి కూడలిలో మీ సందడి లేక, మా టపాలలో మీ కామెంటులు లేక ఏదో వెలితిగా అనిపించింది, మళ్ళీ వచ్చేసారు కదా ఫుల్లు హ్యాప్పీస్.
మేధ said…
మొన్న ఈటివి లో, తెలుగు వెలుగులు కార్యక్రమంలో, బ్లాగుల గురించి చెబుతూ మొదట మీ బ్లాగే చూపించారు.. అప్పుడే మెసేజ్ పెడదామనుకున్నా, మొత్తానికి ఇప్పటికి కుదిరింది.. మీ బ్లాగ్ బ్యాక్ గ్రౌండ్ లో చూపిస్తూ e-Telugu గురించి చెప్పారు...

>>మూడ్, కిలోల్లెక్కన ఏ బజారులోనన్నా దొరుకుతున్నదేమో
సరే అయితే, మా స్నేహితులు కొందరు వ్యాపారం ప్రారంభిద్దామని అనుకుంటున్నారు, కానీ ఏం చేయాలో తోచక ఆగిపోయారు.. ఇక్కడ చాలా మంది కొనే వాళ్ళు కనిపిస్త్తున్నారు కాబట్టి, వాళ్ళని ఈ వ్యాపారం చేయమని చెబుతా! :) (Just kidding)
గురువుగారూ..

ఓ మంచి పాట గురించి మీ అభిరుచులను మరియు అనుభవాలని తెలియ జేయండి.

ఈ విన్నపం చాలు మిమ్మల్ని మరో రెండు లేదా మూడు రోజులు ముప్పు తిప్పలు పెట్టడానికి (నేననుకోవడం)
నా కబుర్ల కోసం ఎప్పుడూ ఎదురు చూస్తుంటామని అందంగా అబద్ధాలాడ నేర్చిన మిత్రులందరికీ బోలెడు ధన్యవాదాలు. :)

ఁఏధ .. ఈ విషయం ఇద్దరు ముగ్గురు మిత్రులు చెప్పారు. సహజంగా సంబరపడ్డాను అనుకోండి. వెంటనే కించిత్ ఆశ్చర్యం కూడా వేసింది. అక్కడ ఉన్న టపా అప్పటికే వారం పదిరోజుల పాతది, పైగా బ్లాగు మొదలెట్టిన నాటినించీ టెంప్లేటయినా మార్చకుండా మొండిగా కూర్చున్నానే, ఇదెందుకు చూపించారా అని. ఈ పనులు చేసేవారికి ఒక సూచన .. ఇక మీదట తెరపట్టులు కానీ, ప్రత్యక్షంగా కానీ చూపే పక్షంలో అతి తాజాగానూ, ఆసక్తికరంగానూ ఉన్న బ్లాగుల్ని చూపమని మనవి. బయటికి కనబడేప్పుడు మరి మనల్ని మనం తాజాగా చూపించ్కోవాలి గదా!
@చక్రవర్తి .. నన్నెక్కడ నొక్కాలో బాగానే కనిపెట్టారు. తప్పక రాస్తాను :)
కొత్తపాళీ గారు మీ టపా ఎంత బాగుందో ఇక్కడ అభిప్రాయాలు కూడా అంత రసవత్తరంగా ఉన్నాయి. బేరాలు వాటి సారాలు (మందుకాదండి బాబు) బాగున్నాయి. ప్రతి టపాకీ ఓ కొత్తపాళీ వెదకకుండా అదేపాళీవాడి చూడండి. టపాలు టపాటపామని రాలుతాయి.
శరత్ said…
హైద్బాద్ వాళ్ళ లాగా మళ్ళీ మనం ఎప్పుడు కలుస్తున్నాం? డెట్రాయిటూ - షికాగో బ్లాగ్మిత్రులు మళ్ళీ ఎప్పుడో కలవటం? మా షికాగో బ్లాగరుల పరిస్థితి ఎలా వుందంటే 'పంచపాండవులంటే అయిదుగురు అని చెప్పి ' సామెతలా వుంది.
Ramani Rao said…
మేధ గారు: మీ స్నేహితులు ఈ మూడ్ వ్యాపారం మొదలుపెడ్తే ఒక్కటే కండిషన్ మరి. 'మూడ్' కిలోల లెక్కన బద్ధకానికి బదులుగా ఇచ్చే ఏర్పాటు చేయమనండి. ఇస్తినమ్మా బద్ధకం - పుచ్చుకొంటినమ్మా మూడ్. మరీ అస్సలు ఆలోచించడంలేదు 'మూడ్' ని డాలర్లు లెక్కలో చాలా ఖరీదు చెప్పేస్తున్నారు బేరసారాలు కుదరవని చెప్తూ....ప్చ్! (Just kidding)
Unknown said…
కొత్తపాళీ గారు వివిధ అంశాల వారీగా తెలుగు బ్లాగులను చూపిస్తూ ఓ వీడియో సిద్ధం చేశాను. అది టీవీ వారికి ప్లే చేసే సమయంలో ఆ చూపించే కొద్ది సెకండ్లు మొదట చూపించిన మీ బ్లాగుని, దానిపై overlay చేసిన 1400 బ్లాగులు అనే గణాంకాలను చూపించారంతే.